投资就系找寻明天嘅大赢家；我老曹近十年早已采用呢个投资策略，即Asset and Sector Allocation Model。
利用资产分配及行业盛衰去制定自己嘅投资大方向。
找寻未来三到六个月表现最出色行业，再利用O高低去决定投入资金比率，利用相对强弱势模式（Relative Performance Model）找寻值得投资嘅股份。
搵出边D股份出现一星期强势、一个月强势及三个月强势（一星期强势可能只系偶发，一个月强势值得注意，三个月强势便殊不简单）。
近年中国股市、印度股市最强，然后香港、美国，最后系日本。下跌就弱势股先行，如日经平均指数下跌三个月，其它国家股市亦将下跌；反之，中国股市上升一段日子，港股亦要跟随……。再以各国GDP增长率、通胀率、利率水平做参考，将投资策略科学化，尽量将人性弱点从投资策略中剔除。
揸美金分担美楼价下跌损失
中东局势刺激油价向上，连金价亦一并带上，呢类政治因素可预测性甚低，现阶段我老曹唔主张过分介入资源股而同意毕非德嘅投资策略。本港H股仲玩紧追上A 股游戏，何时告终亦无法预测，只系H股股价愈接近A股，距离结束日子愈近。美股大跌只因为担心联储局停止减息。假设未来美国楼价继续下跌，第三次减息迟早出现，相信会喺明年1月。联储局今年8月起又再玩Reflation游戏，透过刺激全球股市上升去抵销美国楼价回落及次按危机（2001年1月格老利用刺激美国楼价上升去抵销科网股泡沫爆破）。利用利率一减再减、美元汇价一跌再跌去阻止美国楼价回落所引发呢次按危机扩散到各行各业（1929年联储局所犯错误就系冇及时阻止股市下跌而引发连锁反应）。1990年日本银行所犯错误亦系冇阻止日本楼价下跌影响扩散到银行业……。本港金管局所犯错误系为咗维持联汇制度而唔理会资产膨胀及收缩，系100％技术官僚操作嘅代价（只懂执行职责唔晓灵活变通）。利用减息及美元贬值将美国楼价回落亏损让全球揸美元嘅人齐齐负担，各位揸美元响汇率上嘅损失，就系补贴美国楼价回落嘅部分损失；道理好简单—如果一个人损失1000万元，佢可能会破产；如果一百个人每人损失10万，就冇咩嘢……。说穿了贝南奇所运用嘅策略，系让全球揸美金者齐齐分担美国楼价下跌嘅损失，以阻止危机扩散。
中国、日本、台湾、南韩、香港、新加坡等国家或地区揸最多美金，即系贝南奇搵我地老衬，抵销美国楼价回落嘅损失；点解咁多国家（或地区）又甘于被搵老衬而唔大量拋售美元资产呢？皆因美国系佢地嘅最大贸易伙伴、最大嘅商品及服务买家！如果美国经济衰退自己国家或地区亦受害……。一个愿打、一个愿捱，世界就系咁有趣。
值得思考嘅问题系，美国房地产价格进入回落周期，同时硬商品价格系咪可以出现Supercycle？呢点系我老曹同Jim Rogers最大嘅分歧。中国点解大量吸纳原材料？目的只系制造产品卖到美国。如果美国对制成品吸纳胃口下降，中国会否继续大手吸纳原材料？今年原材料高价可能只系反映美元弱势多于反映原材料需求较去年更强（金价以欧罗计未创新高）。中国近年真正需求嘅系软商品（农产品），响香港投资又缺乏呢方面投资工具。
今年全球表现最出色嘅系内地A股及印度股市。港股亦唔弱（尤其系国企、红筹股），美股So So，日股便冇功课交，证明我老曹睇好中国、睇淡日本策略同民族感情无关，完全系理性分析。明年有人质疑A股系咪过度自信而引发情绪上嘅转向（钟摆理论），呢种质疑值得留意但唔好猜测。千祈唔好日日叫狼来了，咁样下去有一天狼真嚟咗亦冇人信你。A股依家极高嘅估值系存在情绪转向条件，过早担心呢个问题嘅分析员却错过咗十一个月嘅大牛市；响牛市中，如果投资者心态系一旦转向就大件事；即恒生指数如下跌15％，出现大件事机会极大。
钢材股整固后可以再上升
钢铁业喺城市化过程中扮演重要角色，任何国家或地区响工业化时期必有一段日子对钢铁需求十分大，例如1945至80年嘅日本及欧洲战后重建，继后虽然仲有南韩及台湾等国家，地区大搞城市化，但全球钢铁业仍逃唔过供过于求嘅局面。呢次推动钢铁业嘅力量系中国，印度亦开始加入；中国同印度加起来嘅力量应大于当年日本同西欧加起来。上一次钢铁业Super Cycle维持咗三十五年，今次由中国同印度加起来嘅力量肯定超过三十五年，上述未计中东国家因素。从呢点睇，最近钢铁股股价回落只因2007年7月1日起中国政府将出口退税取消后反要征税嘅结果，只系短期因素。从Super Cycle角度睇，钢铁业经整固后又再培养上升力量，至于几时重新睇好钢材股？呢个涉及timing，容后再谈。今年1月中国曾宣布动用1万亿元外汇储备建立策略性投资，以确保资源供应，11月印度将加强勘探俄罗斯库页岛，并同意投资开采该岛资源。日本政府下月将探访南非，以确保获得足够嘅铁矿石供应……。睇嚟各国对天然资源嘅竞争并未停止。过去为咗竞争天然资源而爆发第一次及第二次世界大战；今天因武器威力太大，相信唔会有第三次世界大战，何况银弹早已成为最有力嘅武器，大家已在互掷。
