美林再蚀钱

　　美林第二季蚀咗46.5亿美元或每股4.97美元，系美林历史上最大嘅亏损。过去三季美林已为次按拨备咗300亿美元，2008年第二季仍需拨备97亿美元，为增加资本而出售占20％彭博LP畀彭博母公司，代价系44亿美元；另出售Financial Data Services Inc.，代价系35亿美元。Oppenheimer & Co. 嘅Meredith Whitney认为，营业额大减而开支减少速度追唔上，系所有大企业面对嘅问题。只有出售Winner，因为仍有买家；却要留下Loser，因为冇人要，最后连食饭餐枱亦被迫卖埋。新嘅领导层Thain去年12月接手后必需为美林找寻155亿美元嘅新资金，至今仍未筹够。穆廸公司将美林嘅长债评级由A1降为A2，令筹钱成本进一步上升。

　　美国参议员德明特话，「两房」利用GSE品牌从事私人公司方式运作，有银赚时由股东分享，行政人员亦获私人公司优厚酬劳；喺时势差时就要纳税人负责，实在系太唔公平。说来有道理，睇嚟财长保尔森要求国会以不设上限贷款去支持「两房」有一定困难。

　　贝南奇已挽救咗贝尔斯登，接管埋Indy Mac，以及注资房利美及房贷美，情况好似1991年日本银行嘅总裁三重野康（1990年7月三重野康开始减息，希望日本人再借钱顶住日本楼价）忘记咗八十年代日本经济繁荣建基于负债、杠杆比率及投机活动，上述活动只能制造纸上富贵而唔系真正嘅兴隆昌盛。1990年日股下跌令日本嘅投机者收敛，虽然开始减息，但佢地仍设法减债及降低杠杆比率，结果引发咗一场financial meltdown！1990年起，日本唔系通胀而系通缩（deflation）。1990年前日本因海外投资甚大，企业把海外投资调回，令1990至94年日圆升值，加快咗日本嘅经济陷入通缩；相反，外资喺美国嘅投资很大，2007年9月起资金调离美国令美元贬值，美国出现冰火二重天（房地产及股市系冰天雪地；油价及食品价格系热火朝天），次按令美国嘅亏损超过1万亿美元，而令整个借贷市场萎缩，同时令美国嘅财赤上升，推高长期利率引发大量破产潮，情况都几令人担心。

　　全球分析员都希望喺家吓乱七八糟嘅股市中搵到方向，有人利用利率、失业率、通胀率或GDP增长率，甚至求神问卜；事实上都系猜测游戏，有时准有时唔准（甚至大机构投资者或超级大户都系咁）。

价值投资法须搵牛市起点

　　投资策略嘅最大主流可分为价值投资法。例如谭甫屯喺1939年起步，其后佢将谭甫屯基金以44亿美元出售，并只为自己投资，估计死时身家超过200亿美元；最出名系毕非德，佢1964年起步而成为全球数一数二嘅富翁。其理论基础系低价买入后一直持有，直到极高价时才卖出。各位应留意谭甫屯嘅起步点系1939年，毕非德系1964年；美国嘅超级大牛市由1982年先起步至2007年10月结束。情况好似香港房地产由1967年起步，1997年结束；最大升幅系1984至97年。任何人喺1984年前投资香港房地产都可赚到盘满钵满；如果你系价值投资法嘅支持者，自然赚得更多。任何策略都离唔开时机（例如喺超级大牛市开始前投入，结束前离开，系价值投资法赚大钱背后嘅理由）；相反，喺1990年至今用同样方法投资日本成绩会点？各位问问王增祥便知。七十年代佢系香港大投资家之一，当年家财同唔少今天香港地产富翁差唔多，由于佢响战前留学日本，于日本大学第二商业学校毕业，喺七十年代佢决定卖出香港物业，投资日本嘅王子制纸，并占该公司13％，另一家系片仓工业，占该公司23％……，三十年过去了，佢嘅好朋友例如李超人及彤哥等无不富甲一方，至于佢本人就连新一代嘅香港投资者都好少人认识。佢都系用价值投资法，可惜佢选择嘅地方系日本，唔系香港或美国，过去十八年日本嘅股市不前，令佢响1978年嘅日股投资，由当年日经平均指数5000点，升到2008年7月嘅13000点，升幅得160％；同期恒生指数却由1978年嘅330点，上升到2008年7月嘅22000点，升幅系六十五点五倍。

　　换言之，价值投资法必须找寻超级牛市起步点，而唔系由结束点开始。如果1990年投资日本、1997年投资香港以及2007年投资美国而采用价值投资法者，永远唔会变成谭甫屯或毕非德。细佬，因为你出世得太迟。因通胀回落喺美国1981年开始，楼价回升美国响1982年开始；最低通胀率系2003年，最高楼价系2006年；2004年起美国通胀回升，楼价2006年下半年开始回落，令2007年8月出现次按危机。资产价格回落可能喺2008年年底或09年上半年引发美国衰退。

　　油价回落如因供应增加（或找到替代品系好消息；相反，油价回落因需求下降则系坏消息），一见到油价回落便将股价炒上者可能系表错情或炒错市。油价系咪见顶同油价系咪泡沫系两回事。由荷兰郁金香、到密西西比投资、1997年香港楼价，2000年科股泡沫及去年内地A股，人人事前都知道系泡沫，何时爆破都系喺事后先知。例如香港房地产爆破喺1997年第三季；科网股泡沫爆破喺2000年3月；内地A股爆破喺2007年10月。油价已处泡沫期呢点系十分肯定嘅，系咪见顶？木宰羊。如果以金价计，十年前一盎斯黄金可买十桶油，依家只可买七桶油，即油价应喺100美元左右一桶先合理（或金价上升30％）。由于睇唔通，最好少D沾手。

　　面对超级大牛市嘅结束（通常得二十二至三十年长。美国今次系二十五年），请勿再用价值投资法，应改用蔡至勇嘅策略，即系近年本栏一再推介嘅牛眼投资法。利用时机喺最短嘅时间内赚取本金100％或以上嘅回报，一旦形势唔对就止蚀离场，把损失局限喺投入本金15％至20％之间。

　　对学晓牛眼投资法嘅人嚟讲，嗰D仍然采用价值投资法嘅人系懒惰嘅投资者。喺现今瞬息万变嘅社会点可以买入后持有呢？国共之争，蒋介石相信以不变应万变，结果退守台湾；毛泽东以万变应付万变，结果就得天下。花开堪折直需折，莫待无花空折枝。

　　网上唔少人问我老曹，假如1974年12月你持有十万股和记，并一直持有到依家又会点？我老曹可以回答系市值升至760万元（未计三十四年派息），真实情况系我老曹喺1976年初以每股2.8元卖咗，套番28万元再投资，到1981年我老曹已拥有第一个100万元。由于当年香港嘅主权问题闹到热烘烘及听郭得胜嘅话三七分，即70％揸现金，只揸30万元股份，一直到1984年7月才再次重新入市。喺牛市中以每年50％速度增加财富；响熊市中将亏损局限系15-20％。

　　VIX（volatility index）系量度美股嘅波幅，当佢上升时通常代表股市回落紧；因为股市中唔存在被迫买家，但存在被迫沽家，例如孖展Call，喺咁嘅情况下引发股价急跌令VIX急升，例如1998年长期资金服务公司出事，以及2002年10月科网股拋售高潮，VIX均超过40点，事后证明系入市良机，其余时间都很少超过30点，一旦超出30点通常系入市嘅时机（最近喺27点即渐接近拋售嘅高潮）。

贝南奇不够经验

　　技术上睇美股仍有10％或以上嘅跌幅。金融股一旦完成反弹，未来嘅跌幅喺30％至40％，理由系未来两至三年仲有10000亿美元呆坏账拨备。冇理由相信熊市只系跌30％（上述只系平均数）及时间十八个月（上述亦系平均数而已）。每个熊市出现都系泡沫爆破后遗症，今次系次按泡沫及楼价泡沫。

　　与2000年嗰次唔同嘅系贝南奇经验唔够，一开始就乱枪扫射，将利率由5.25厘降至2厘，依家面对大熊又冇子弹，但熊市只开始咗八个月，以后嘅日子点捱？格老系市场出身，完全掌握市场脉搏，贝南奇喺象牙塔里长大，只有理论而冇实战经验，流于纸上谈兵。