7月23日，周三。恒生指数升607.07，收23134.55；成交757.86亿元。7月期指升829点，收23260点；8月期指升823点，收23243点，高水。东亚银行（023）升4.6％、汇控（005）升2.9％、国泰（293）升6.3％、东方航空（670）升11.8％、中石化（386）升5.3％。

沪深三百指数跌0.74％，收2883.32。同仁堂年仅三十九岁嘅董事长张生瑜因心脏病逝世，英年早逝，令人可惜，亦令同仁堂失去掌门人。

战后至今，除咗一个国家外，所有奥运会主办国响奥运圣火熄灭前后，都经历咗经济滑坡。不过，中国政府顾问、中国改革研究基金会、国民经济研究所负责人樊纲认为，北京奥运会后，中国经济仍将快速及健康增长。

北京可避过奥运后遗症
大摩最近报告指出，战后至今，十一个主办过奥运会嘅城市中，只有1996年美国亚特兰大嘅经济响奥运会后冇出现放缓迹象。北京只占中国GDP 4-5%，加上响建设新体育场馆及基建上冇今天花明天钱嘅情况，相信可避过奥运后遗症。

标准普尔亦认为，中国并冇将自己响财政上保持谨慎嘅传统拋诸脑后，早已防范其它奥运主办城市中出现嘅「白象」效应。例如2004年主办奥运会嘅雅典，唔少奥运场馆到现今仍然闲置。北京一向缺乏体育及娱乐设施，未来北京奥运场正好服务日益富裕嘅一千七百万北京人口。

德意志银行7月22日报告认为，中国内地面临经济下滑风险大于通胀风险。出口量增速已由去年上半年24%下降到今年上半年13%，一D地方例如珠三角已有10%中小企业倒闭，部分中小房地产企业由于资金链断裂而被迫降价，清货压力导致房地产价格下降及销售量下滑。反之，CPI升幅由4月份嘅8.5%降至6月份嘅7.1%，估计7、8月份CPI升幅少于7%。

根据花旗Elaine Chu资料，今年上半年从亚洲基金流失资金约140亿美元，即去年认购亚洲离岸基金有85％已赎回。上周流失资金约8亿美元（最近七星期平均每周12亿美元），估计拋售力量在减弱中（去年净流入164亿美元）。最大拋售力量响6月19日至7月9日，由每周平均嘅6.45亿美元，最高曾见22亿美元。7月9日后拋售力量已减弱，但唔排除股市回升后仍有小量拋售。五穷、六绝、七翻身，相信熊市第二期另一只脚由7月16日开始，呢次反弹理论上可维持到8月下旬才结束，但并唔系因为有新资金流入，而系拋售力量告一段落，因此唔排除干升现象出现（例如升市成交额未能大幅上升）。

沪深三百指数由去年10月嘅五十三倍P/E，回落到最近嘅二十一倍；印度Sensitive指数由年初嘅三十一倍P/E，回落到依家嘅十四倍。现水平计，中国股票及印度股票再唔系贵，但亦唔便宜，估计可以玩上落市。

房利美及房贷美手上未售出物业今年3月总值69亿美元（全美八千五百间银行手上未售出物业共值85.6亿美元），被接管物业即使减价20％仍未能售出，即两房手上物业如全部售出，最少亏损13.9亿美元。除咗上述外，房利美亦持有或担保512亿美元次按，以及持有或担保3446亿美元Alt-A贷款。

两房典型官商勾结
1998年两房嘅主脑谂出一条赚大钱嘅绝桥，就系用两房嘅低息借贷能力购入高息次按债券，令房贷美债券持有量由1998年嘅250亿美元升到2007年嘅2670亿美元；房利美由185亿美元升到1270亿美元，令两房纯利大升。五大巨头因此获分派1.99亿美元红利，股东及管理层获分派1220亿美元股息及福利。好喇，依家出事嘞，亏损却由美国纳税人负担？唔通资本主义只有天堂而冇地狱？过去十年两房为游说国会议员去保护佢地嘅「特权」而用咗1.7亿美元，更多资金用于几届总统选举上，乃典型官商勾结！即使今天面对重大亏损，仍希望派息6.5亿美元一年！真系奇哉怪也。

美国两房贷款机构摇摇欲坠，美国金融危机仍未到柳暗花明嘅时候。美国人借贷消费受到打击，再不能寅吃卯粮。金融业系美国经济嘅脊骨，如今已出现毛病；消费业系美国经济嘅血液，依家变得唔畅通；美国经济肯定有病，而且在恶化中。

英伦银行货币政策委员会理事布兰弗罗话，英国经济正步入衰退，要求大幅减息去减轻借贷成本；估计英国快将出现GDP负增长！依家英伦银行利率5厘、通胀率3.8%（目标通胀2%）。布兰弗罗估计英国房地产价格将下跌达30%，萎缩期可能长达一年；估计英国明年GDP升幅只有1%。

全球性去杠杆化（deleveraging）及对衰退嘅恐惧，短期出现极端（VIX喺7月16日曾见30，相当高啤打系数），令一次技术反弹出现，但唔代表熊市见底。

投资尤其系trading乃辛苦嘅工作。金融市场瞬息万变，每次回望，我老曹都认为自己可以做得更好一D。检讨过去以便提升自己未来作战能力，乃我老曹一向作风。今天策略系点样将波幅（volatility）变为自己嘅机会（opportunity）。例如学习阅读VIX，睇VIX便知道油价到达147美元时系拋空而非买入时机。睇VIX亦搵到7月16日乃熊市嘅脚。今天股市再唔系一个稳定嘅世界，而系一个充满波幅嘅市场，作为投资者不但唔好怕波幅，反而学习利用波幅增加自己嘅财富。请学习牛眼投资法，练好自己嘅功夫，以便一矢中的。唔好再相信买入后持有法，因为已经过时；今天需要嘅系快、狠、准，唔再做懒惰嘅投资者。

7月16日开始嘅反弹有一特色，就系喺海外嘅银行股反弹十分有力，乃去年5月至今少见。海外银行股系咪见底？抑或系因为美国证监会严限拋空嘅结果？著名银行股分析公司Ladenburg Thalmann分析师Richard Bove认为，欧美银行股已严重超卖，系一生人少见嘅购入机会。佢认为，美国政府接管IndyMac，系二十年内最大嘅一次接管行动，乃满街鲜血、入市时机。

投资切忌动真感情
记得1989年6月5日我老曹亦曾用「满街鲜血、入市时机」叫各位买港股，曾被已故香大侠破口大骂我老曹「冇血性」，我老曹唔开心咗一个月，因香大侠教咗我老曹好多嘢，我老曹亦好尊重佢，所以反复思考我老曹自己系咪冇血性？后来我老曹谂通咗，北京六四事件与我老曹买唔买股票无关，投资股票就系要「冇血性」！其后香大侠将泰盛出售，1997年更将自己嘅住宅卖掉，去咗新加坡住，充分反映佢大情大性，但佢亦犯咗投资学上嘅大忌：「动咗真感情！」

今天外国银行股系咪最黑暗嘅时刻，同时系最光明嘅时刻？事后才知道。我老曹意见系不妨牛刀小试，例如花旗银行、富通银行、皇家苏格兰银行及瑞银等都几便宜。明知山有虎，偏向虎山行。古龙教落：最危险嘅地方可能系最安全嘅地方。

Fisher Investments创办人Ken Fisher唔认为依家系信贷压缩（credit crunch），而系信贷重新分配（credit reallocation）。大及高质素嘅贷款者获取廉价信贷好容易；反之细及低质素嘅贷款者获取信贷成本却十分昂贵。形势对大企业有利，对中、小企不利。佢批评年纪渐大投资者过分强调安全而错失机会，例如追求回报率（yields）而非赚价。

本周一Michael Kahn响《巴隆氏》发表意见：各位请听住，金融股已见底，但唔系牛市开始，请唔好做chicken littles，天冇跌落嚟！佢认为，7月16日起领袖股变成落后股，例如石油股同资源股；落后股却强力反弹，例如银行股。Select SPDR Energy ETF本来相对强势，但6月底已结束！能源股同资源股成拋售项目而非吸纳对象。Michael Kahn大有来头，佢写咗三本有关技术分析嘅书，亦系Chief Technical Analyst for BridgeNews及Market Technicians Association前董事；佢嘅blog地址系www.quicktakespro.blogspot.com。

美国银行、运通银行公布今年第二季业绩令人失望，主因系信用卡问题逐渐浮现。例如美国运通信用卡消费，4月较去年同期升10％、5月升5％、6月升2％，相信7月份更差。呢类依赖信用卡去提供盈利嘅银行，投资者可以少沾手（虽然毕非德亦揸咗美国运通，可能佢年纪太大，已成为懒惰嘅投资者）。美国地区银行SunTrust响资金压力下，被迫出售由1919年一直持有嘅可口可乐（毕非德另一爱股），收回20亿美元去增加银行资本充足比率。可乐股价近年表现一直令人失望，因美国本土已冇增长，全赖新兴国家市场支持营业额上升。

今天值得学习嘅对象再唔系毕非德，而系五十二岁嘅John Paulson，呢位前贝尔斯登银行家乃CDS专家，佢管理嘅Credit Opportunities Fund去年获利系本金六倍，共赚到200亿美元。管理层获花红37亿美元，而佢自己净赚17亿美元，成为2007年收入最多嘅对冲基金经纪。今年上半年该基金再升值26％（同期标普五百跌15％）。John Paulson一年内令自己变成《福布斯》四百位全美最富有嘅人中排名一百六十五，快、狠、准乃佢投资策略嘅特色，你做得到咩？跌市唔系赚唔到钱嘅理由，只能怪自己学艺未精。家吓佢公司管理嘅资金已达330亿美元，计划12月份开办另一基金，集资多少未定，目的系向金融机构提供资本。

知名人士预测唔好信
Amex Securities Broker/Dealer指数过去十二个月下跌35％。雷曼兄弟、美林、Wachovia、Washington Mutual 股价跌幅都超过65％，由Paulson计划组成基金向金融机构提供资本睇，明年系咪执银行股嘅日子？

美国证监禁止祼空（Naked Short）共三十天，代表7月中到8月中乃睇好嘅安全期。市场出现典型挟淡仓行为，淡友暂时揠旗息鼓，留番9月再算。

去年12月根据Association of Investment Companies统计，约三分二基金经理及四分三投资顾问仍然对今年股市展望乐观（即使熊市已喺去年11月开始）。虽然2008年只过咗一半，但相信佢地预测准确嘅机会亦唔大。2008年属鼠而非属熊，今年呢只熊都几霸道，令人感到沮丧及悲观。应付之道系多D去旅行或学习新事物，皆有助减轻财政问题所带来嘅苦楚。无论边个，只要作预测便必定迟早出错，因此应该把注意力集中喺拣股而非预测大市方向。除非你嘅投资技巧较风水佬更胜一筹，不然便少D预测，只须追随趋势。近期知名人士如罗杰斯上周睇好石油及食物，已吃了眼前亏。知名人士预测成绩同我老曹一样，时准时唔准，所以唔好信。